MNF chuan, Zoram tana him lo thei zawng zela hma a lak luih mek laia ZPM party leh Sorkarna fawng chelhtute ring ngam tura midangte a chah leh si kha thil inkawkalh leh awmze nei lo a ni a. Mizoramin rohlu a neih zinga pawimawh berte zinga mi, mihringte dam khawchhuahna atana pawimawh ber, Environment awlsam zawka tih chhiat theih dan kawng dap tlattu leh, kan  ramngaw neih ang angte venhim aia hnawk ti zawktu Chief Minister, Mizoramin a nei hi a vanduaithlak a, kawng dik lo leh him lo taka Zoram a kalpui mek hi thangthar lo awm leh zel turten nasa takin an la tuar thei dawn a ni, an ti.

Lalduhoma’n Forest Conservation Act hi Forest humhimna a ni tih a sawi leh Supreme Court in TN Godavarman thubuai a ngaihtuahnaa Forest a hrilhfiah dan a sawite kha thu dik dinglai a ni a. Hetihlai hian he Dan siamthatna, FCAA 2023 hnuaia Central sorkarin Mizoram chhunga thuneihna sang tak a rawn neih theihna tur rawn awm thar ta dodal a hneka, Mizoramin India Constitution hnuaia humhimna kan neih hlu tak Article 371G che lek ngam lo leh a pal zut zawnga hma a la ta hlauh zawk hi Mizoram leh Mizo hnam tan a pawi a, Mizo hnam a ti thangtlawm bawk a ni, an ti a.

Forest Conservation Act, 1980, Dan dinglai hnuaiah khaw zauhna tur emaw, ramngaw behchhana eizawnna kalpuina kawngah emaw Zoram mipuiten harsatna tawk lovin hei chen kan lo kal tawh a, hmasawnna ruhrel pawimawhte pawh Forest Dan zawmin heti zat sorkar kal tawhten an lo din tawh a, chutihlaia Dan dinglai hnuaiah chuan ramngaw behchhana eizawngtu, thingtlang lama chengte zawng zawng pawhin harsatna tawk vek tur ang zawnga a sawi leh, hmasawnna engmah thawh theih loh ang tluk deuh thawa a sawi kha mipui rilru kawng dik lova hruai tumna zahpuiawm tak a ni a.

Nungchate humhalh bikna hmun (sanctuary) tibuai tur zawnga kawng laih tlang luih sorkarin a tum dan leh Forest Clearance hmuh theih loh vanga harsatna a thlen thu a sawite phei kha chu tunlai khawvel, ramngaw leh nungcha humhalh kawnga thanharhna thleng chho mek nena thil in kalh a ni a. Mizo thalaite ngei pawh hi environment ti chhe lo zawnga hmasawnna hnathawh (sustainable development) duhtu leh aupuitu an ni tawh tih hre phak lo Chief Minister Mizoramin a hrawn mek a ni, tiin an tarlang.

Lalduhoma’n ‘Forest Conservation (Amendment) Act, 2023 in State sorkar thuneihna sang zawk min pe ta’ tia a sawi mai hi thu belhchian dawl lo a ni. He Dan siamthatna leh a hnuaia dan tesepte hi mi zawng zawng tan chhiar theih vek a ni a, State sorkar awlsamna tura duan a ni lova, Central sorkar thuneihna sang tak pekna liau liau a ni tih hi thudik zawk a ni, MNF chuan an ti.

MNF chuan, He dan siamthatna hian Central sorkar chu India venhimna kaihhnawih reng rengah Mizoram chhung khawi hmunah pawh Forest Clearance ngai lova kan ramngaw leh kan leilungte a suasam theihna tur kawng a hawnsak a, Kawngpui, Rel kawng, Gas & Oil Pipeline, inbiak pawhna lam chi te leh sipai awmna tur hmun thlengin awlsam takin a bun zung zung thei tawh dawn zawk a. He dan siamthatna hnuaiah hian lei chhungril hausakna haichhuah kawngah pawh Mizoram chhung khawi hmunah pawh duh duha hmalak theihna tur thuneihna chu Central sorkar kutah pek a ni bawk, an ti a.

Chief Minister Lalduhoma hian Mizoram himna aiin, Defence kaltlanga hmasawnna ruhrel engemaw tal neih theih dan dapa, Central sorkar tlawn a thlang zawk tih Mizorama kawngpui 7 te Defence kuta hlan anih thu leh kawngpui dangte pawh hlan zel tum anih thu a puan nghal atang hian a lang chiang em em an ti a. 

"Sum leh development duh vang chauhin, kum hnih liamta maia amah ngei pawhinin chelek ngam tura State sorkar a lo nawr Constitution Article 371G chu central sorkar tlawn vang chauhin a chelek ngam ta lo a. Lalduhoma hian Mizoram inhumhimna chabi pawimawh ber chu Central sorkar kutah a hlan fel der a, Mizoram leilung, ramngaw leh nungchate nasa taka ti chhe tur zawngin, thang lo thar leh zel turte tan pawi nasa tak a khawih mek tih inhre chhuak a, inlamlet thuai turin MNF chuan a ngen a ni," tiin an thuchhuah ah tarlan a ni.